தமிழக இடைக்கால பட்ஜெட் 2026: சட்டமன்றத் தேர்தல் நேரத்தில் வெளியாகும் முக்கிய அறிவிப்புகள்!
நடப்பாண்டு தேர்தல் ஆண்டு என்பதால் மிகவும் முக்கியத்துவம் வாய்ந்ததாக பார்க்கப்படுகிறது. தமிழகத்தை ஆளும் திமுக அரசு தங்கள் ஆட்சியை தக்க வைத்து கொள்ள வேண்டும் எனத் தீவிரம் காட்டி வருகின்றனர். குறிப்பாக தேர்தல் வாக்குறுதிகள் தயாரிப்பில் அதிக கவனம் செலுத்தி கொண்டிருக்கின்றனர். இதற்கு முன்னோட்டமாக மகளிர் உரிமைத் தொகையை 1,000 ரூபாயில் இருந்து 2,000 ரூபாயாக உயர்த்தி வழங்கப்படும் என்று அறிவித்ததுடன், அதிரடியாக 5,000 ரூபாய் தொகுப்பை ஒரே நாளில் பெண் பயனாளிகளின் வங்கிக் கணக்கில் விடுவித்து முதலமைச்சர் மு.க.ஸ்டாலின் ஆச்சரியப்படுத்தினார்.
தமிழக இடைக்கால பட்ஜெட் தாக்கல்இந்த சூழலில் தான் நாளைய தினம் பட்ஜெட் தாக்கல் செய்யப்படுகிறது. சட்டமன்றத் தேர்தல் வருவதால் தற்போது இடைக்கால பட்ஜெட் மட்டுமே தாக்கலாகிறது. புதிய அரசு அமைந்ததும் முழுமையான பட்ஜெட் தாக்கல் செய்யப்படும் என்பது கவனிக்கத்தக்கது. இதுதொடர்பாக கடந்த வாரம் செய்தியாளர்களிடம் பேசிய சபாநாயகர் அப்பாவு, வரும் 17ஆம் தேதி காலை 9.30 மணிக்கு தலைமை செயலக சட்டமன்ற வளாகத்தில் உள்ள கூட்ட அரங்கில் அடுத்த கூட்டத்தொடர் கூடுகிறது. அன்றைய தினம் 2026-27ஆம் ஆண்டிற்கான இடைக்கால பட்ஜெட்டை நிதியமைச்சர் தங்கம் தென்னரசு தாக்கல் செய்வார்.
அமைச்சர் தங்கம் தென்னரசு ஏற்பாடுபிப்ரவரி 20ஆம் தேதி வரும் நிதியாண்டிற்கான முன்பண மானிய கோரிக்கை, 2025-26ஆம் ஆண்டிற்கான கூடுதல் செலவீனங்களுக்கான மானியக் கோரிக்கை ஆகியவை வாசித்து அளிக்கப்படும். கூட்டத்தொடரை எத்தனை நாட்கள் நடத்துவது என அலுவல் ஆய்வு கூட்டத்தில் ஆலோசித்து முடிவு செய்யப்படும் என்றார். இந்நிலையில் தமிழக அரசின் இடைக்கால பட்ஜெட்டில் என்னென்ன அறிவிப்புகள் வெளியாகும் என்ற எதிர்பார்ப்பு ஏற்பட்டிருக்கிறது. இதில் பெயருக்கு மட்டுமே சில அறிவிப்புகள் வெளியாகும் என்கின்றனர்.
மகளிர் உரிமைத் தொகை முதல் உள்கட்டமைப்பு வசதிகள் வரைஇருப்பினும் கலைஞர் மகளிர் உரிமைத் தொகை திட்டத்தின்தொடர்ச்சி மற்றும் விரிவாக்கம் தொடர்பான அறிவிப்புகள் இடம்பெறக்கூடும். குறிப்பாக உங்க கனவை சொல்லுங்க என்ற முதலமைச்சர் மு.க.ஸ்டாலினின் லேட்டஸ்ட் அறிவிப்பு தொடர்பாக பொதுமக்களிடம் இருந்து பல்வேறு கோரிக்கைகள் பெறப்பட்டன. இதன் அடிப்படையில் சில அறிவிப்புகள் வெளியாகலாம். மேலும் இதிலிருந்து சில முக்கியமான விஷயங்களை 2026 தேர்தல் அறிக்கையிலும் திமுக சேர்த்து கொள்ள வாய்ப்பிருக்கிறது.
டெண்டர் கோரும் பணிகள்தேர்தல் நெருங்கி விட்டதால் சென்னை உள்ளிட்ட முக்கிய நகரங்களில் உள்கட்டமைப்பு வசதிகள் சார்ந்த திட்டங்கள் கிடப்பில் போடப்பட்டுள்ளன. ஏனெனில் டெண்டர் கோருவதற்கு நாட்கள் ஆகும். அடுத்த சில வாரங்களில் முடிப்பது சிரமம் எனக் கூறப்படுகிறது. இருப்பினும் விரைந்து முடிக்க வேண்டிய திட்டங்களுக்கு நிதி ஒதுக்கீடும், கிடப்பில் போடப்பட்ட திட்டங்களுக்கு புத்துயிர் ஊட்டும் வகையிலும் இடைக்கால பட்ஜெட்டில் அறிவிப்புகள் வெளியாகலாம்.
புதிய நகரங்களில் மெட்ரோ ரயில் திட்டங்கள்தமிழகத்தில் கோவை, மதுரை உள்ளிட்ட நகரங்களில் மெட்ரோ ரயில் திட்டங்களுக்கு மத்திய அரசு ஒப்புதல் அளிக்கவில்லை. இதற்கு தமிழக அரசு தரப்பில் இருந்து சில முன்னெடுப்புகளை எடுக்கலாம். இதையடுத்து கல்வி, சுகாதாரம், விவசாயம், தொழில்நுட்ப வளர்ச்சி, வேலைவாய்ப்பு உள்ளிட்ட துறைகள் சார்ந்து முக்கியமான அறிவிப்புகள் வெளியிடப்படும் என்று எதிர்பார்க்கப்படுகிறது.