மத்திய உள்துறை அமைச்சகம், இந்தியக் காவல் பணி (ஐபிஎஸ்) அதிகாரிகளுக்கான பதவி உயர்வு மற்றும் மத்திய அரசுப் பணிகளில் நியமிக்கப்படுவதற்கான விதிமுறைகளில் முக்கிய மாற்றத்தைக் கொண்டு வந்துள்ளது.
இதன்படி, இனிவரும் காலங்களில் மத்திய அரசில் ஐஜி அந்தஸ்திலான பதவிகளைப் பெற விரும்பும் ஐபிஎஸ் அதிகாரிகள், அதற்கு முன்னதாகக் குறைந்தபட்சம் இரண்டு ஆண்டுகள் மத்திய அரசுப் பணியில் எஸ்பி அல்லது டிஐஜி நிலைப் பதவிகளில் பணியாற்றியிருக்க வேண்டும்.
இதுவரை ஐஏஎஸ் அதிகாரிகளுக்கு மட்டுமே இத்தகைய கட்டாய மத்தியப் பணி விதிமுறை நடைமுறையில் இருந்தது. இப்போது முதல்முறையாக ஐபிஎஸ் அதிகாரிகளுக்கும் இது கட்டாயமாக்கப்பட்டுள்ளது. இதன் மூலம் ஐஏஎஸ் மற்றும் ஐபிஎஸ் அதிகாரிகளுக்கு இடையிலான நிர்வாக நடைமுறைகள் சமன் செய்யப்பட்டுள்ளன. மாநில அரசுகள் தங்களின் ஐபிஎஸ் அதிகாரிகளை மத்தியப் பணிக்கு அனுப்ப ஊக்குவிக்கவும் இந்த நடவடிக்கை உதவும்.